Dariok Buruz Buruko Txapelketatik kanpo utzi du Irribarria (13-22)

2020-11-14

Iazko Buruz Buruko txapelduna, Irribarria, eta Promozio mailako txapelduna, Dario, finalerdietako aurreneko txartelaren bila kantxaratu ziren atzo Irungo Urantzu pilotalekura. 

Txapelduna izaki, Irribarria zen faborito nagusia partida hasi aurretik baina Darioren aldeko ahots batzuen marmarra ere somatu zitekeen norgehiagoka bezperetan.
Partidari estu ekin zioten bi aurrelariek baina Irribarria deseroso ikus bazitekeen ere, Dario patxada onean ageri zen.
Ezkaraitarra gero eta alde handiagoa hartuz joan zen markagailuan eta aramarra edozein egoera iraultzeko dohainak baditu ere, atzokoan ez zen gai izan partidari eusteko. Azkenean 13-22 irabazi zuen Dariok.

Promozio mailako Buruz Buruko Txapelketako bi kanporaketa ere jokatu zituzten atzo Irunen. Aurrenekoan, Arteaga II.ak 22-7 irabazi zuen Zabalaren aurka. Eta jaialdiko azken norgehiagokan 18-22 nagusitu zitzaion Salaberria Erasuni.