Masters CaixaBank finala jokatuko dute gaur Bilboko Bizkaia Frontoian

2020-09-28

Hamalau jardunaldi eta finalerdi bana jokatu ondoren, Altuna III-Imaz eta Artola-Rezusta CaixaBank Masterseko finalean izango dira gaur arratsaldean Bizkaia Frontoian.

Artolak eta Rezustak hamaika garaipen erdietsi dituzte sailkapen ligan eta Altuna III.ak eta Imazek bat gutxiago, hamar. Elkarren aurka jokatu dituzten bi partidak, Altuna III.ak eta Imazek irabazi dituzte. Laugarren jardunaldian, Zarautzen, 22-14 gainditu zituzten Artola eta Rezusta, eta hamabigarren jardunaldian, Lekeition, norgehiagoka estuagoan 22-20 irabazi zuten Altuna III-Imazek. Partida honetan Peña II.ak jokatu zuen Artolaren ordez.

Arratsaldeko 17:00tan hasiko da Bilboko pilota jaialdia Elezkano II-Bikuña eta Agirre-Aretxabaletaren arteko partidarekin.