Aldaketak CaixaBank Masterseko sailkapenaren goiko aldean

2020-08-08

Zestoan hasi dira goizen, iluntzeko 21:15ean. Bengoetxea VI-Martija lidergoari eutsi nahian eta Altuna III-Imaz lidergoa harrapatu nahian kantxaratu dira. Partida gorabeheratsua izan bada ere, urdinek erregulartasun handiagoa azaldu dute eta garaipena bereganatu dute (16-22). Emaitza honekin, Bengoetxea VI-Martijak pausu bat atzera egin dute sailkapenean.

Zizurkilen eta Getarian 22:00tan eman diete hasiera herriko pilota jaialdiei. Jaka-Albisuk eta Artola-Rezustak gogotsu ekin diote partidari Intxaur pilotalekuan. Gorriak aurretik jarri badira ere hasieran (4-1), urdinek berehala erantzun dute sei tanto jarraian eginez eta markagailua irauliz (4-7). Hortik aurrera Artolak eta Rezustak errazago egin dute lan eta abantaila handituz joan dira azkenengo 14-22koa itxi arte. Garaipen honekin sailkapenaren buruan jarri dira gipuzkoarrak.

Getariako Sahatsaga frontoira hurreratu diren pilotazaleek Olaizola II-Zabaletaren eta Ezkurdia-Arangurenen arteko pilota partidarekin gozatu ahal izan dute. Sendo ekin diote partidari Ezkurdiak eta Arangurenek lehenengo zazpi tantoak eskuratuz. 6-14 ere joan dira aurretik urdinak baina zazpi tanto jarraian egin ondoren, 13-15 hurbildu dira Olaizola II-Zabaleta. 17-17 berdintzea ere lortu dute azken txanpan, baina handik aurrerako tanto guztiak urdinek egin dituzte eta 17-22ko emaitzarekin zarratu dute partida.