MEGAk profesionalen esku pilota partidak emango ditu

2025-10-10

Bainetek eta MEGAk bat egin dute esku pilota profesionala zabaltzeko.

Igande honetatik aurrera, urriak 12, 10:00etan, MEGA kanalean, Sergio Vegasen eskutik, “FRONTÓN MEGA” esku pilota profesionalaren emanaldiak hasiko dira. Lehen saio honetan, gaur egun pilotari profesionalak jokatzen ari diren 4 1/2 Eusko Label Txapelketako final-laurdenetako Ezkurdia eta Larrazabalen arteko partidaz gozatu ahal izango da. Emankizun hauetan, sei txapela irabazitako Ruben Beloki pilotari ohi profesionalaren laguntza berezia izango dute.

Igande honetan “FRONTÓN MEGA”-n ikusi ahal izango den Ezkurdia-Larrazabal norgehiagokak final-laurdenetako ligari hasiera emango dio. Fase honetan lortutako puntu bakoitza oso garrantzitsua izango da finalerdietara sailkatu ahal izateko.

Larrazabal eta Ezkurdia etxeko lanak eginda iritsi dira partidara, final-zortzirenetako kanporaketan euren aurkariak mendean hartuta. Amurrioko aurrelariak Zubizarreta III.a txapelketatik kanpo utzi zuen Eibarko Astelena pilotalekuan 22-15eko emaitzarekin, eta Ezkurdiak ostiralean lortu zuen txartela Zallan, Elordi 22-17 mendean hartuta.

Emisioak igandero izango dira, 10:00etan, MEGA kanalean.