Aimar Olaizolak eta Julen Retegik bat egin dute Iruñako Labrit pilotalekuan larunbatez jokatuko duten Lau eta E´rdiko Txapelketako final laurdeneko partidurako pilotak bereizteko.
Biak gustora geratu dira otarrean aurkitu duten materialarekin eta ez dute inolako pegarik jarri.
Frontoi motzean egun txapeldun den Olaizola II.ak, 105 eta 104, 5 gramoko pilotak hartu ditu, aurkariarenak baino latzagoak direnak hain zuzen ere.
Retegi BIk 105 eta 105,6 gramokoak hautatu ditu. Kasu honetan bote erdikoak, normalak.
Olaizola II.a asegarce.comekin mintzatzen aritu da eta hau da esan diguna:
Gustora materialarekin?
“Bai, Bi loteak onak dira. Nirea apur bat latzagoa da”.
Nolako partidua espero duzu?
“Gogorra. Bera pilotaria da eta ondo jokatzen du botez. Gainera distanzian arazorik gabe moldatzen da”.
Faborito ateratzea kaltegarria da?
“Ohituta nago faboritotzat jota jokatzen. Ez diot sekulan garrantzirik eman. Partidua jokatu behar da eta faboritoa izateak ez du bera irabazten. Ez dut inongo presiorik”.
Nola ikusten duzu anaiaren partida?
“Denok ezagutzen ditugu Titinek lau eta e´rdian dauzkan doaiak, baina Asier ondo jokatzen ari da eta irabaz diezaioke”.
Aukeraketa Balmasedan
Txapelketako laurdenetako beste partidu bat Balmasedan jokatuko da ostiral honetan eta hori dela eta Titin III.a eta Olaizola I.a udal pilotalekura bertaratu dira.
Titin III.ak 105,7 eta 105,1 gramoko pilotak aukeratu ditu, antza denez, goizuetarrarenak baino biziagoak.
Asierrek aldiz, 105,5 eta 105,8 gramoko larruzko bi hartu ditu. Hauek abiadura gutxiagokoak dira.
Asegarce.com-en izan duen solasaldian zera esan du aurrelari nafarrak:
“Ilusioz nator partidua jokatzera. Fisikoki sasoian nago eta eskuak ondo dauzkat.
Titin III.arekin aurka jokatzeak aurrekoekin kontra baino askoz ere ezberdina da. Ehuneko ehunean aritu behar zara denetariko jokaldiak egiteko gai delako”.