2026-03-31
Bi txapelketak asteburu honetan hasiko dira Bastidan, Logroñon, Zarautzen eta Lizarran. Buruz Buruko Txapelketako finala maiatzaren 31n jokatuko da Nafarroa Arenan. Eta Serie B Txapelketa Labriten bukatuko da maiatzaren 23an.
- Altuna III, Artola, Bakaikoa, Dario, Elordi, Ezkurdia, Jaka, Larrazabal, Laso, P.Etxeberria, Peña II eta Zabala Buruz Buruko txapela janzten saiatuko dira.
- Buruz Buruko Serie B Txapelketan Agirre, Alberdi II, Aldabe, Amiano, Egiguren V, Eskiroz, Murua, Rekalde, Salaberria, Senar, Zubizarreta III eta Zubizarreta IV.a izango dira protagonistak.
- Bi lehiaketak final-zortzirenetako kanporaketekin hasiko dira, ondoren final-laurdenetako liga jokatuko dute, eta ondoren finalerdiak eta finala jokatuko dituzte.
- CaixaBankek Buruz Buruko Txapelketako babesle nagusia izaten jarraituko du.
Bilbo, 2026ko martxoaren 31
Buruz Buruko Txapelketa irabazten saiatuko diren pilotarien zerrenda eman dute ezagutzera gaur goizean egindako aurkezpenean. Baiko Pilotako sei ordezkari eta Aspeko beste sei ahaleginduko dira maiatzaren 31ko finalean txapela janzten.
Gaur goizean Bilboko Bizkaia Frontoian egindako aurkezpenean izan dira Joserra Garai Pelota Pro Ligako kontseilari delegatua, Juan Pedro Badiola CaixaBankeko Ipar Lurralde zuzendaria, Unai Iglesias Baiko Pilotako arduradun komertziala eta Inaxio Errandonea Aspe Pelotako arduradun komertziala.
Ostiralean Bastidan hasita
Asteburu honetan bertan jokatuko dituzte final-zortzirenetako kanporaketak. Dariok eta Elordik ostiralean ekingo diote lehiaketari Bastidan; larunbatean, Zabalak eta Bakaikoak Logroñon neurtuko dituzte indarrak, eta Peña II-P.Etxeberriak Zarautzen; eta igandean Ezkurdiak eta Jakak final-zortzirenetako fasea itxiko dute Lizarran. Altuna III, Artola, Larrazabal eta Laso final-laurdenetan zain izango dira.
Buruz Buruko Serie B Txapelketa
Baikok eta Aspek Serie B Txapelketako txapela janzteko hautagaiak ere aurkeztu dituzte gaur goizean Bilbon. Agirre, Alberdi II, Aldabe, Amiano, Egiguren V, Eskiroz, Murua, Rekalde, Salaberria, Senar, Zubizarreta III eta Zubizarreta IV.a. Guztiak Bakaikoari erreleboa ematen saiatuko dira, iazko txapelduna izan zena eta aurten Buruz Buruko Txapelketa jokatuko duena.
Sarrerak eskuragarri
Txapelketa bietako jaialdietarako sarrerak entradasfronton atarian eskuratu daitezke jadanik.