OLAIZOLA II: “BERO-BERO HASIKO NAIZ TITINEN KONTRA”

2019-03-22

Eguerdiko hamabiak aldera bat egin dute Olaizola II.ak eta Titin III.ak Ogeta pilotalekuan datorren igandean jokatuko duten Lau eta Erdiko finalerdietako ligaxkaren lehen norgehiagokarako pilotak aukeratzeko.
Materialari buruz Olaizolak inolako arazorik ipini ez duen bitartean Titin III.ak partiduaren ondoren horretaz mintzatuko dela aitortu du

Olaizolak ohiko pilotak bereiztu ditu, hots, “Frontisetik gutxi atera baina lurretik ondo dabilen materiala”. Partidari buruz zera esan du goizuetarrak:
“Partidu zaila izango da. Titinek joku azkarra egiten du, airez oso arriskutsua da eta gainera errematatzen pilotari onenetarikoa dela uste dut. Ahaleginduko naiz bere airea zapuzten. Berak sake luzea egin eta gero erremate bizia gauzatzen du.
Haren hasiera azkarra eta beroari aurre egiteko ni ere bero-bero aterako naiz kantxara”.

Titin, materialari buruz, mutu

Titin III.ak bere aldetik honako adierazpenak luzatu ditu:
“Materialari buruz, espero nuena. Ez dut horretaz hitz egingo. Partiduaren ostean bai mintzatuko naizela.
Aimar txapelduna da baina diferentziak kantxan ikusi behar dira. Finalaurrekoetan sartu garen laurok dauzkagu aukerak.
Neu nere jokua egiten ahaleginduko naiz, hau da, arin jokatu, arriskatu eta tantuak azkar bukatzen saiatu. Partida luzea badoa kaltegarria izango da niretzat”.

Titin III: 105,7-104,5 gramo.
Olaizola II: 106,2-103,9 gramo.