2023-11-21
– Txapelketa ostiralean hasiko da eta martxoaren 31n amaituko da Iruñeako Nafarroa Arenako finalarekin
– 14 jardunaldi izango ditu sailkapen ligak, playoffetako hiru partida jokatuko dituzte, eta hiru jardunaldi izango ditu finalerdietako ligak
– Jaka-Mariezkurrena II, Altuna III-Martija, Laso-Aranguren, P.Etxeberria-Zabaleta, Peña II-Albisu, Ezkurdia-Tolosa, Artola-Imaz, eta Elordi-Rezusta txapela irabazten saiatuko dira
Binakako Txapelketa irabazten saiatuko diren pilotarien zerrenda eman dute ezagutzera gaur goizean egindako aurkezpenean. Baiko Pilotako lau bikote eta Aspeko beste lau ahaleginduko dira martxoaren 31ko finalean txapela janzten.
Baiko eta Aspeko bikoteak
Baiko Pilotak bere koadroko lau bikote hauek aukeratu ditu txapela lortzeko asmoarekin: Jaka-Mariezkurrena II, Laso-Aranguren, Peña II-Albisu eta Artola-Imaz. Helburu berarekin, ASPE Pelotak Altuna III-Martija, P.Etxeberria-Zabaleta, Ezkurdia-Tolosa eta Elordi-Rezusta aurkeztu ditu.
Ostiral honetan hasiko da
Ostiralean emango diote hasiera lehiaketari Azkoitian Ezkurdia-Tolosak eta P.Etxeberria-Zabaletak. Lasoren itzulera gertu badago ere, ez da lehenengo jardunaldira iritsiko, eta bere ordez Larrazabalek jokatuko du larunbatean Aizarnazabalen. Bertan izango dira Jaka-Mariezkurrena II.a eta Larrazabal-Aranguren. Igandean Artola-Imaz eta Peña II-Albisu izango dira aurrez aurre Seguran; eta azaroaren 30ean, Eibarren, Elordi-Rezusta eta Elezkano II-Martija saiatuko dira aurreneko puntua eskuratzen.
Sailkapen liga, playoffak, finalerdietako liga eta finala
Ostiralean hasi eta martxora bitartean luzatuko da Eskuz Binakako EPEL 2024 Txapelketa. Zazpi jardunaldiko bi itzuli, orotara hamalau jardunaldi jokatuko dituzte pilotariek sailkapen ligan. Bi bikote onenak zuzenean sailkatuko dira finalerdietako ligara eta hirugarren eta seigarren postuen artean sailkatuek playoffak jokatu beharko dituzte aurrera egin ahal izateko. Finalerdietako ligak hiru jardunaldi izango ditu eta final handia Nafarroa Arenan izango da martxoaren 31n, igandean.
Sarrerak
Aurreneko jardunaldietako jaialdietarako sarrerak entradasfronton webgunean eskuratu daitezke jadanik.